काठमाडौं- स्पेनिस ला लिगामा रियल मड्रिडले लेगानेसलाई ३–० ले हराएको छ । गएराति सम्पन्न खेलमा रियलको जितमा केलियन एम्बाप्पे, फेडेरिको भाल्भर्डे र जुड वेलिंघमले समान एक गोल गरे ।
भिनिसियस जुनियरको पासमा एम्बाप्पेले ४३औँ मिनेटमा रियललाई अग्रता दिलाए । उनले चार खेलपछि गोल गरेका हुन् । यसअघि एम्बाप्पेले ला लिगमा २० अक्टोबरमा सेल्टाभिगोविरुद्ध गोल गरेका थिए ।
त्यसपछि बोरुसिया डर्टमन्ड, बार्सिलोना, एसी मिलान र ओसासुनाविरुद्ध उनी गोलविहीन थिए ।
यो जितपछि रियल तालिकाको दोस्रो स्थानमा उक्लिएको छ । १३ खेलबाट उसको ३० अंक छ । १४ खेल खेलेको बार्सिलोना ३४ अंकसहित शीर्ष स्थानमा छ ।
१४ खेलबाट १४ अंक जोडेको लेगानेस १४औँ स्थानमा छ ।
