काठमाडौं–पशुपतिनाथमा सुनको जलहरीको विषय संसदमै उठेपछि शुक्रबार बैठक अवरुद्ध भएको थियो । तर सुनको जलहरीको सन्दर्भमा तथ्य एउटा र बहस अर्कै भएको देखिएको छ ।
सुनको जलहरीको सन्दर्भमा आएका सूचना तथ्यभन्दा फरक भएको देखिएको छ । सुनको जलहरी बनाएर मुचुल्का उठाउने क्रममा भएको परिमाणात्मक त्रुटिका कारण यो विषय विवादित बनेको हो भन्ने तथ्य खुलेको छ ।
पशुपति क्षेत्र विकास कोषका कार्यकारी निर्देशक डा. घनश्याम खतिवडाका अनुसार १०८ किलोग्राम सुनको जलहरी निर्माणका क्रममा कुनै गडबडी नभएको बताए । ‘२४ सै घण्टा नेपाली सेनाको टोलीको निगरानीमा जलहरी बनाइएको हो । नेपाल राष्ट्र बैंकबाट सुन खरिददेखि जलहरी मन्दिरमा लगेर प्राणप्रतिष्ठा गरुञ्जेल सम्म सेनाको टोलीले एकछिन पनि छोडेको छैन, अनि कसरी सुन हराएको हल्ला गरिँदै छ?’
नेपाली सेनाका सूचना अधिकारी एवं सहायक रथी कृष्णप्रसाद भण्डारीले अन्य निकायजस्तै नेपाली सेनाको टोली पनि जलहरी बनाउँदा खटिएको बताए । ‘सेनाको टोली राष्ट्र बैंकबाट सुन किनेर निर्माण सम्पन्न हुँदासम्म खटिएको हो ।
उनले भने २०७७ माघ १२ गते तत्कालीन प्रधानमन्त्री एवं नेकपा एमालेका अध्यक्ष केपी शर्मा ओली पशुपतिनाथको दर्शन गर्न गएका थिए । कोषले राखेको आगन्तुक पुस्तिकामा उनले ‘आज श्रीपशुपतिनाथको दर्शन गर्ने सुअवसर मिल्यो । स्वर्ण जलहरी बनाउने यहाँको समितिको इच्छा पूरा गर्न अपुग हुने रकम ३० करोड नेपाल सरकारका तर्फबाट तत्काल दिइने छ । आगामी महाशिवरात्रिसम्ममा सो जलहरी निर्माण भइसक्ने छ भन्ने विश्वास लिएको छु’ लेखेका छन् ।
त्यसको दुई दिनपछि माघ १४ गते कोषका अध्यक्षसमेत रहेका तत्कालीन संस्कृति, पर्यटन तथा नागरिक उड्डयनमन्त्री भानुभक्त ढकालको अध्यक्षतामा कोषको सञ्चालक परिषद्को बैठक बसेको थियो । डा. खतिवडाका अनुसार बैठकले जलहरी निर्माणका लागि लाग्ने अनुमानित ८० करोडमध्ये ३० करोड रुपैयाँ सरकारले व्यहोर्ने र बाँकी ५० करोड रुपैयाँ कोषले उपलब्ध गराउने गरी महाशिवरात्रिअगावै सुनको जलहरी निर्माण गर्ने निर्णय भएको थियो ।
खतिवडाका अनुसार जलहरी निर्माणका क्रममा परिषद् सदस्य, कर्मचारी, भण्डारी र सुरक्षा निकायका प्रतिनिधिको रेखदेखमा मुचुल्का तयार गरिएको थियो । ‘मुचुल्काबमोजिम ९६ किलो ८२२ ग्राम सुनको जलहरी बनाएर चाँदीको जलहरीमाथि राखिएको र बाँकी रहेको १० किलो ९७६ ग्राम सुनमध्ये जलहरीको माथिल्लो भाग सुरक्षाका लागि रिङ, पेटी तथा सुनका किला बनाइएको छ । बाँकी रहेका टुक्राटाक्री सुन सेफमा राखिएको छ’, उनले भने ।
