अक्टोबर १६ मा मनाइने विश्व खाद्य दिवस नेपालमा भने चाँडपर्वका कारण आज मनाइँदै

काठमाडौं- अक्टोबर १६ मा मनाइने विश्व खाद्य दिवस नेपालमा भने चाँडपर्वका कारण आज मनाइँदैछ।

सन् १९७९ नोभेम्बरको संयुक्त राष्ट्र सङ्घको २० औँ साधारण सभाले सङ्गठनको स्थापना भएको दिन पारी खाद्य दिवस मनाउने प्रस्ताव पारित गरे अनुरूप सन् १९८१ देखि विविध कार्यक्रमको आयोजना गरेर यो दिवस मनाउँदै आएको हो ।    

‘सुखी जीवन र समुन्नत भविष्यका लागि खाद्य अधिकार’ मूल नाराका साथ सोमबार (आज) ४४ औँ विश्व खाद्य दिवस विभिन्न कार्यक्रम गरी मनाइँदै छ ।

कृषि विभागले सोमबार बिहान प्रभातफेरी गरी कृषिमन्त्री रामनाथ अधिकारीको प्रमुख आतिथ्यमा दिवसको मूल समारोहको आयोजना गरिने विभागका महानिर्देशक डा. नरहरिप्रसाद घिमिरेले जानकारी गराउनुभयो । 

विश्व खाद्य दिवस प्रत्येक वर्ष अक्टोबर १६ मा मनाइन्छ । संयुक्त राष्ट्र सङ्घको खाद्य तथा कृषि सङ्गठन (एफएओ) को आह्वानमा यो दिवस मनाउँदै आएको छ । अक्टोबर १६ मा यो दिवस मनाइए पनि यस पटक चाडपर्वका कारण असोज २१ गते मनाउन लागिएको विभागले जनाएको छ ।