पाठशाला न्यूज
 २०८१ जेष्ठ ५, शनिवार    

विश्वको प्रदूषित शहरको सूचीमा दोस्रो नम्बरमा काठमाडौं

२०८१ वैशाख २२, शनिवार १२:१९ बजे

काठमाडौं : डढेलो र आगलागीका कारण काठमाडौं उपत्यकासहित देशका अधिकांश भूभागमा प्रदूषण बढेको छ । ‘एयर क्वालिटी इन्डेक्स’का अनुसार शनिबार बिहान काठमाडौँको वायु गुणस्तर सूचकांक २०२ पुगेको छ ।
शनिबार काठमाडौँ विश्वको प्रदूषित शहरको सूचीमा दोस्रो नम्बरमा सूचीकृत छ । मौसम पूर्वानुमान महाशाखाका अनुसार पानी नपरुञ्जेल र हावाको मात्रा नबढुञ्जेलसम्म प्रदूषण हट्ने सम्भावना छैन । यद्यपि आगामी सोमबार भने पश्चिमी वायुको प्रभावले उपत्यकामा वर्षाको सम्भावना रहेकाले प्रदूषण केही मात्रा हट्ने महाशाखाका मौसमविद् सरोज पुडासैनीले बताए ।
केही दिनको उच्च तापक्रम भने अहिले घट्दो क्रममा छ । सबैभन्दा उच्च तापक्रम पुग्ने भैरहवामा आज ३७ देखि ३९ डिग्री सेल्यिससम्म पुग्न सक्ने अनुमान गरिएको छ । शुक्रबार भैरहवामा ३९.२ डिग्री सेल्सियस मापन गरिएको थियो ।

यस्तै काठमाडौं ३१ दशमलव ८ डिग्री सेल्सियस मापन गरिएको थियो । शनिबार पनि काठमाडौंमा सोही हाराहारीमा तापक्रम पुग्ने अनुमान गरेको मौसमविद् पुडासैनीले बताए ।