काठमाडौं- अख्तियार दुरुपयोग अनुसन्धान आयोगले अनियमितता गरेको आरोपमा हुम्लाको चंखेली गाउँपालिकाका तत्कालीन निमित्त प्रमुख प्रशासकीय अधिकृत विष्णु बहादुर शाहीसहित ७ जनाविरुद्ध मुद्दा दायर गरिएको छ।
गाउँपालिकाको वडा नम्बर ३ स्थित सुकिचौर हुँदै चिमाङसम्मको बाटो निर्माण कार्यमा निर्माण स्थलको वास्तविक तथ्य बङ्ग्याइ भए गरेको कार्यभन्दा बढी मूल्याङ्कन गरी नापी किताबमा चढाई हस्ताक्षर गरी निर्माणस्थलमा भए गरेको कार्यभन्दा बढी तथा साईटमा नगरे/नगराएको परिमाणको झुट्टा बिल भरपाई तथा कार्य सम्पन्न प्रतिवेदन तयार तथा स्वीकृत गरी दुई लाख बाइस हजार पाँच सय तीन रुपैयाँ सत्र पैसा बढी भुक्तानी दिई भ्रष्टाचार गरेको अख्तियारको दाबी छ ।
उक्त मुद्दामा शाहीसँगै इन्जिनियर रुद्र बहादुर वली, असिस्टेन्ट सब-इन्जिनियर हर्कधन बुढा, वडा नं. ३ का तत्कालीन वडा अध्यक्ष शालिग्राम ऐडी, उपभोक्ता समितिका अध्यक्ष मनजित रोकाया, सचिव धनपति ऐडी र कोषाध्यक्ष पुनी ऐडीलाई पनि प्रतिवादी बनाइएको छ ।
