काठमाडौं- भन्सार विभागको तथ्याङ्क अनुसार दुई महिनाको अवधिमा चार लाख किलोलिटर पेट्रोलियम पदार्थ आयात भएको छ ।
चालु आर्थिक वर्षको गत दुुई महिनामा इन्धन (डिजेल, पेट्रोल, मटितेल, हवाई इन्धन, ग्यास)को आयात १९ प्रतिशतले बढेर ३९ अर्ब १२ करोड रुपियाँ बराबरको ४ लाख १ सय ९० किलोलिटर इन्धन आयात भएको हो ।
अघिल्लो वर्ष यो अवधिमा ३ लाख ८९ हजार ८ सय २० किलोलिटर इन्धन आयात भएको थियो । नेपाल आयल निगमको तथ्याङ्क अनुसार दुई महिनाको अवधिमा सबैभन्दा धेरै- डिजेल १ लाख ७० हजार १ सय ११ किलोलिटर आयात भएको छ भने पेट्रोल १ लाख १३ हजार ३ सय ४, हवाई इन्धन २६ हजार ८ सय ८४ किलोलिटर आयात भएको छ । यसैगरी मट्टितेल १ हजार ६ सय २० किलोलिटर र खाना पकाउने एलपी ग्यास ८८ हजार २ सय ७१ मेट्रिक टन आयात भएको छ । गत वर्षको तुलनामा डिजेल, पेट्रोलको आयात सामान्य बढे पनि हवाई इन्धन र ग्यासको आयात भने उच्च छ । गत वर्षको तुुलनामा हवाई इन्धन चार हजार किलोलिटर र ग्यास पाँच हजार मेट्रिक टन बढी आयात भएको छ । गत वर्षको तुलनामा आयात बढेसँगै इन्धनको खपतसमेत वृद्धि भएको छ ।
उपत्यकाबाट ठुलो सङ्ख्यामा सवारीसाधन बाहिर जाने भएकाले पनि डिजेलको खपत अन्य समयको तुलनामा बढी हुने गर्छ । दसैँ मान्न यात्रु उपत्यकाबाहिर जाने हुँदा सवारीसाधन धेरै सङ्ख्यामा चल्ने गर्छन् । जसको कारणले गर्दा पनि डिजेल खपत बढी हुने गर्छ ।
घटस्थापनाको दिनदेखि स्कुल, कलेज बिदा हुने हुँदा यात्रुहरू बाहिरिन सुरु हुन्छ । सप्तमीको दिनदेखि दसैँ बिदा हुँदा उपत्यकाबाट बाहिर जाने सार्वजनिक यातायातको चहलपहल बढी हुने गर्छ
